চাঙমা ভাষা ভালেদি জধার হয়েকখান পুঝোরর জুওপ

গেল্লে দি মাহ্জে দি বার চাঙমা লেঘা দাবী গরিনেই চাঙমা ভাষা ভালেদি শল্লাদারী কমিটি সিধু ডেপুটেশন দিনেই আমার মানবলা শল্লাদারী কমিটির মেম্বারুনে হয়েকখান পুঝোরর তুলোপারা গচ্চোন। আমার মনে অহ্য় সিয়েনি ভেক্কানি ঝাদি মাদি চাঙমা জাদর মুজুঙে ভাঙাচুরো গরিভার দরকার আঘে। ন’অহ্লে সে পুঝোরানিয়ে আমারে অনসুর পিঝেদি টানিবো। হি সেই পুঝোরানি ? এগে এগে তোলেই চা’ যোক -

১॥ চাঙমা মিডিয়াম চালু অহ্লে আমা চাঙমা পুও-ছাবাঘুন ইরুক যুগোর জিদেজিত্যাত লেম পরিবাক নেনা ঃ পুঝোরানর উজু মানে, মা-ভাষন্দি শিক্ষের উগুদো গরানা। যে জাগাত গদা পিত্থিমির বে’ক শিক্ষে কাবিলুনে মা-ভাষন্দি শিক্ষে দিলে বেঘত্থুন গম হন, সবায় ন’পারিলে অন্তত চিগোন’ লক্কে হন’গুরোয় মা-ভাষন্দি শিক্ষে পেলে দোল ভিলি তুলোপারা গরি যেয়োন, সে জাগাত আমা চাঙমা ভাষা দরদী মেম্বারুনে সন্দেহ গরন, আমা হধাদি আমা গুরোগুনে শিক্ষে পেলে হন’ বরবাদ যেবাকনি! তে আমাত্থুন পারা পরাকবাল্যা জাত আর পিত্থিমিত হুধু পা’ যেব’ ? ইয়েন অহ্লদে আমা বুদ্ধিজীবিগুনো উগুরে ঔপনিবেশিক প্রভাপ যে হোত্তোমান তার পতপত্যা প্রমান। আমার মনত রাঘা পরিবো, ন’বুচ্চে গরি মনত ভরেই পরীক্ষে দি দি আমি হয়ত আমা জাদত বড় বড় অফিসার পেভঙ, বড় বড় ডাক্তর-ইঞ্জিনীয়ার পেভঙ - মাত্তর ডাঙর মানুচ ন’পেভঙ।

২॥ চাঙমা লেঘাদি বই ছাবেবার টেন্ডার ধরি পারে পারা পাবলিশার্স আমি হুধু পেভঙ ঃ সরকারী কন্ট্রাক্ট লোনেই বই ছাবাদে সে পাবলিশার্সচোর হয়েকখান ঠায়ঠিক গুনগত মাপকাঠি লাগে। যেমন, হয়েক বঝরধরি তার সে বাবদর বই ছাবেবার এক্সপেরিয়েন্স থা’ পরে। মাত্তর ধাপ থেলে সরকারে বা শিক্ষে দপ্তরে হি সে শর্তগানি সজমজ গরি ন’পারে ? সালে, পত্থম যেক্কে ককবরক বা বিঞ্চুপ্রিয়া মনিপুরী বই ছাবেলাক, সিগুন হন্না ছাবেই দিলো ? ইক্কুনু যে চাঙমা বোয়ুন বাংলা অহ্রগে ছাবা অহ্র সিগুনদ’ সরকারী প্রেসে ছাবেই দে’র। সালে সিগুনো সরকারী প্রেসেই ছাবেই দিবো। ফারক্কান অহ্লদে, বাংলা অহ্রগে অহ্লে আমার বানা পান্ডুলিপি জমা দিলেই ছাবেই দি পাত্তাক আ চাঙমা লেঘাদি অহ্লে আমার কম্পোজ্ড্ কপি জমা দিয়ে পরিবো। ন’ অহ্লে তারা চাঙমা ফন্টে কম্পোজ গরি জানিধাক নয়। ইচ্চে গরিলে সরকারে এসসিইআরটিত বা সরকারী প্রেসত এক জন চাঙমা কম্পোজার রিক্রুত গরিপারে। তিবুরা সরকারে ধারাজ গরিলে সিএডিসি-য়ো বই দিবো ভিলি বার বার জানেয়ে সিধুগোর এডুকেশনর ইএম সুনানু ড. বুদ্ধধন চাঙমা। আঝল হধাগান অহ্লদে, আমা শল্লাদারী কমিটির মেম্বারুনে হয়েকজনে যদি চাঙমা লেঘা জানিধাক সালে পিত্থিমিঘান এত্তোমান আন্ধার ন’ দেলাক্কুন তারা।

৩॥ (ইয়েন বানা হয়েক জনে তুল্লোন্নে) আমি সরকারী চাগুরি গরিই আমি চাঙমা লেঘার হধা তুলি ন’ পারিই ঃ চাঙমা ভাষা ভালেদি জধা ইক্কো সরকারী কমিটি। তার মেম্বারুনোরে নব্ভাচ গরে সরকারে। হন’ জনরে শল্লাদারী কমিটির চাবাঙী নব্ভাচ গরিভার অত্থ অহ্লদে তারে সরকারে হত্তে, তুই আমারে চাঙমা ভাষার হিঙিরি ভালেদ অহ্ব’ সে পইদ্যানে শল্লা-পরামর্শ দে। সালে ‘শল্লা দি ন’পারিই’ হনার মানে সরকারী অর্ডারর উগুধো গরানা। সে উগুধো হধাগানই তিবুরার চাঙমাগুনোরে আমা চাঙমা ভাষা ভালেদি শল্লাদারী কমিটির মেম্বরুনে বুঝাদন। যিগুনে শল্লাদারী কমিটিত থেনেই হোভাক আমি ‘শল্লা দি ন’পারিই’, তারার আর এক্কেনায়ো অহ্লিপ ন’গরিনেই কমিটিত্থুন লামি যেবার দরকার আঘে। সালেই চাঙমা জাদর ভালেত অহ্ব।

৪॥ সভানানুয়ে আরকানি ন’নেযায়, আমি হি গত্তঙ ঃ কমিটিবো হি বানা সভানানুর ? যদি স্যা অহ্দ’ সালে কমিটি বানেবার হন’ দরকার ন’ এল। মিটিঙ ডাগিবাত্যায় হয় জন মেম্বারে সভানানুরে হোয়েন চিধি দুওন ? জধার নিয়ম মজিম হন’ জধার তিন ভাগর দি ভাক মেম্বারে যদি মনে গরন, হন’ পইদ্যানে তেম্মাঙ গরিভার দরকার আঘে সালে সভানানুয়ে তেম্মাঙ ডাগদে বাধ্য। আ তুয়ো যদি ন’ডাগে সালেন মেম্বারুনে সভানানু ছাড়ায়ো তেম্মাঙ গরি পারন। আ তেম্মাঙত বঝিলে সিদ্ধান্তর হধা যদি তুলো অহ্য় সালেয়ো হো যায় বেচ ভাক মেম্বারুনে যদি হন’ হিচ্চুর পইদ্যানে সিদ্ধান্ত নিধাক চা’ন, সালে সিয়েনো সভানানুয়ে মানি নেযাদে বাধ্য। সালে আমি মনে গরিই সভানানুরে বাঝেই দেনা মানে নিজ’ বুগিবো পররে বুগেই দিবার চেষ্ঠা ছাড়া আর হিচ্চু নয়।

উগুরোর হধানিত্থুন তিবুরার চাঙমাগুনে আন্দাচ গরি পারিবাক যে, গেল্লে ২৭ বঝর ধরি তিবুরাত হন বাবদর মানুঝোর শল্লা মজিম চাঙমা ভাষার ভালেত অহ্র। সিগুনোর মুজুঙোত্থুন যে চাঙমা ভাষা ভালেদির ফাইল আহ্জি যেবগোই, বেজাদি উগর হাবর অফিসারুনে যে মনেমনজক্কা গরিভাক, সিয়েনদ’ জানা হধাই। সে বাবদর মানুচ্যুনোর জকমজিম শল্লাদারী জধা আর হয়েক্কো দিন চলিলে চাঙমা জাত্তো যেত্তোমান তলে লামিবো সিত্থুন টানি তুলোদে গুমুত্যা বলীরো হের মের যেব’।

মাদি, নভেম্বর, ২০১০, আট্য বঝর, নাদা-৫৬