কবি সুনানু অনিল বরন চাঙমার ডাগনি মজিম এ বঝরবুও গদা তিবুরাত ‘আদি কবি শিব চরন ঈদোদী বঝর’ ইজেবে পালন গরা অহ্র। ইয়েন এক্খান ভারি দোল আরকানি ভিলি আমি মনে গরিই। আমার কোজলী থেব বানা তিবুরাত নয়, গদা পিত্থিমিত যিদু যিদু চাঙমা আঘন ভেক্কুনে - যে যিঙিরি পারে - মিলনী সভা গোরিনেই, লেঘা লেগিনেই, তা জিঙহানি পইদ্যানে তালাভি গোরিনেই, গীত গেনেই, কবিতা জরেনেই - যার যিঙিরি আরি আঘে এ গদা বঝরবোত আমি আমার আদি কবিবোরে ঈদোত তুলিবোঙ।
বিদি যেয়ে পয়নাঙী হাররে ঈদোদ গরানাহ্ নিজর শিঙোর তোগানা। নিজে আক্কোই যেবার পদ তোগানা। বুঘর ভিদিরে বল ভরানা। ম হিয়েত যে সে পয়নাঙী মানুচ্চুনোর লো এভ’ সঙ বোই যার, ম মাধাত যে তারার মেধাগানি এভ’ সঙ জমা আঘে সে হধাগান নুও গরি ঈদোত তুলোনা। সেনত্যেই তারারে ঈদোত তুলনা । যারারে ঈদোত তুলিবোঙ তারার নয়, আমনরই দরকার।
মাদি, মার্চ, ২০১০, আট্য বঝর, নাদা - ৪৮
No comments:
Post a Comment