সুনানু বিদি যেয়ে এম. এন. লারমা হোয়ে, ‘‘রাজনৈতিক অধিকার ছাড়া হন অধিকার তিগি থেই ন পারে।’’ রাজনৈতিক অধিকার অহ্ল’ সে বলা মাদিঘান যুওত যে হন অধিকার - অর্থনৈতিক, সামাজিক, ধর্মীয় বা ভাষাগত অধিকারর চারা লাগেলে সে অধিকারর ভালেদর ফসল আমি ঘরত তুলি পারিই। আর রাজনৈতিক অধিকার যদি হন জাদর ন থায় সালে হন অধিকারর বিজিই সে জাদর বুঘত গেজেই ন পারন। সেনত্তেই, আমি রাজনীতি গমপেই বা ন পেই, জিগুনে রাজনীতি গরন তারারে হোচপেই বা ন পেই - রাজনীতি আমা জিঙহানিঘান চেরোপালাত্তুন বেরেই থেবই থেব।
এম. এল. এ. ওহ্বাত্তেই রাজনীতি, চাগুরি পেভাত্তেই রাজনীতি - ইয়েনি রাজনীতি নয়, সুবিধেনীতি। দঝর ভালেদত্তেই দঝরে লোনেই হাম গরানাই অহ্লদে আঝল রাজনীতি। আর এ দঝর ভিদিরে নিজরে যেমন গনি পারে, তেমনি ধরি পারে নিজর ঘোরবো আ জাদরে। সেনত্তেই দোল রাজনীদিয়ে দঝর ভালেদর লঘে নিজর, নিজ’ ঘোরবোর আ নিজ জাদরো ভালেদ গরিবো হামাক্কায়।
একখান হধা আঘে, ‘তিবুরার চাঙমাগুনে নিজে রাজনীতি ন গরন, তারারে পরে রাজনীতি গরান্নে।’ হধাগান তোলেই চেলে মিঝে নয়। একজন প্রকৃত রাজনৈতিক কর্মীর হামেধি তার জাদর, বামর জনগনর আহ্ওজর ছাবা ফুদি উধিবো। কিন্তু চাঙমা রাজনৈতিক কর্মীগুনে তারার জাদর মানুষ্যুনোর রাজনৈতিক চেতনা ফুদেই তুলনার মধ্যেদি নিজর সমস্যা নিজে সমাধান গরিবার আন্দোলনত নেতৃত্ব দি ন পারন। তারা হাম গরন নিজ জাদর গনতান্ত্রিক ধাবপানিরে চাবেই থোবার বা জুদো পধেদি নেযেবার এজেন্ট ঈজেবে। তারা নিজর জাদর হধা মু খুলি হধে এমন ডড়ান যে, মানুজে মনে গরিভাক তারা হন খুন বা ডাগেদি গরিভার তেম্মাঙ গরধন। অথচ তারারই আকমোলিগুনোর জিঙহানি তলবিচ গরিলে আমি দেঘিই যে, তারা আন্দোলন গড়েই তুলিবাত্তেই হন’ এক্কান বামত যেনেই সে বামর মানুষ্যুনোর সমস্যা জানিবার চেষ্টা গোচ্চোন্দোয়, পরেধি সে সমস্যাগানি উগুরে ভর গরিনেই গণ আন্দোলন গড়ি তুল্যন।
কারণ, গণতন্ত্রত দঝর ধাপ-আহ্ওজই আঝল হধা। যে তন্ত্রয় দঝর ইচ্ছেরে দাম ন দিবো সিয়েন যে কোন তন্ত্রই ওহ্ক, গণতন্ত্র কিন্তু নয়। সেনত্তেই যেধকদিন সঙ চাঙমা রাজনীতি গরিয়েগুনে নিজর বামর, নিজর জাদর মানুষ্যুনোর ধাপ-আহ্ওচ্চানিরে দাম ন দিবাক সেধকদিন সঙ তারার নিজর থিধেবি যেমন দরমর ন অহ্ব’ নিজর জাদরো হন ডাঙরমাক্যা ভালেত ন অহ্ব’।
মাদি, জুন, ২০১০, আট্য বঝর, নাদা-৫১
No comments:
Post a Comment